蒙面法

Hi，都係上一個迷惘的中二生，希望可以解決我嘅煩惱~
尋日政府通過咗蒙面法，我哋嘅班主任讀咗教育局封信比我哋聽，就係好傷心。
今年為咗提高效率，我將自己嘅時間表改咗。每日6點左右起身，然後返學，7:45同recess喺學校靜坐，打鐘後去上堂。上堂時就偷偷地做功課同温書。放學後食少少野，然後再睇書學英文。每日都係咁過，不得不講，咁樣真係節省咗好多時間，不過喺學校就覺得好攰。
我哋學校每日都有靜坐，雖然話5大訴求，唔滿足晒都唔會放棄，但係尋日親身感受到緊急法嘅恐怖。
我真係好驚，感覺一切都好快玩完，我冇得戴口罩，甚至幾日連ig都撳唔到。
我有個frd好早同我講話佢屋企人會叫佢去留學，所以我就諗住同佢一齊去，叫佢儘早通知我。而正正喺尋日，佢就同我講佢會中四去，好大機會係去紐西蘭。
我唔知點算，因為我屋企人喺呢一方面冇幫到我，我都唔知留學係咪最易移民嘅方法。上個月，我同啊爸提咗叫佢幫我問個移民律師，佢本身應承我佢會喺1個月之內回應我，但係佢去到今個月都冇揾到。我知佢唔覺得呢件事重要，所以我尋日就決定要喊要發脾氣都要迫到佢幫我問，佢終於幫我訂到日期問，大約係10月24/25號。我真係好驚，留學呢樣野我已經冇得推遲諗，但係又冇人幫到我。
之前你同我講過英國嗰度點樣，但係英國嘅難度好似太高，所以我都同意同學諗住去紐西蘭呢個諗法。講真我真係好驚，因為條例訂落嚟非常容易，但係我要移民就好難。我必須要知道留學移民同其他移民方式邊個較為重要先得，但我啊爸根本冇認為呢件事好重要。我個frd有家人幫，如果我靠自己嘅話根本好難實現。加上留學都用好多錢，我有個啊哥，所以家人比我哋嘅錢都儘量平分，我如果喺留學方面用太多錢，其他方面就一定會少咗幫助，所以去留學就等於一個移民嘅賭注。我真係好驚。
唔該使者如果可以就幫我解答一下我嘅問題，如果解答唔到請幫定定心慌(；д；)

---

綠茶豆腐